^^^--- SHIKAST ---^^^

^^^--- SHIKAST ---^^^

 

 

Subah k Ujaloon Mein Jab b Aankh Khulti Hay

Main Tery Khayalon Se

Aitraaz Karnay Ka Ehd Kar k Uthta Hoon

Yunhi Be Khayali Mein

Jab' Wasi' Ka Koi Shair Gungunata Hoon

Rooh Jaag Uthti Hay,Dil Sakoon Pata Hay

 

Lekin Uss k Shairon Par Jab b Ghor Karta Hoon

Mujh Ko Aisa Lagta Hay

Vo Sitam Gazeeda b Apni Sari Ghazlon Mein

Tera Zikr Karta Hay

 

Main Tery Khayalon Se Sir Jhatak k Uthta Hoon

Tez Tez Qadmoon Se Bahir Ko Nikalta Hoon

Pur Hajoom Galiyoon Mein

Har Jagah Dukanoon Par

BeQarar Phirta Hoon,Tujh Ko Bhool Jata Hoon

Be Niaz Lamhoon Mein

Jab Koi Pari Pekar Pass Se Guzarti Hay

Mera Dil Machalta Hay, Zor Se Dharakta Hay

Aur Vo Pari Pekar Tera Aks Lagti Hay

Phir Vohi Teri Yaadein,Phir Shikast Khata Hoon

 

Aur Main Teri Yadoon Se Door Bhag Janay Ko

Sabz Posh Baaghon Mein Sair Ko Nikalta Hoon

Sabz Sabz Chadar Par Sir Jhukaye Chalta Hoon

Be Shumar Pholoon k

Rung Aur Khushboo Se

Dil Zara Behalta Hay

Phir Kahin Darakhtoon k Pur Sakoon Saaye Mein

Pyar Karnay Walon Ko

Pur Khumar Lehjay Mein HumKalaam Pata Hoon

Phir Teri Qurbat Mein Kat Chukay Haseen Lamhey

Mujh Ko Yaad Aatay Hain,Phir Shikast Hoti Hay

Aur Main Thaka Haara Ghar Ko Laut Aata Hoon

 

Shaam k Andhery Jab Shab Taraaz Hotay Hain

Aur Mera Akela Pan Soonay Soonay Bistar Par

Phir Se Teri Yaadon Ki Chaadrein Bichata Hay

Tab Mery Iradey b Haar Maan Letay Hain

Main Tery Khayaloon Ko Orrhna Banata Hoon

Roz Shikast Khata Hoon

Roz Shikast Khata Hoon...!!!